Nye heimesider!

Ryfylke Kajakk har laga nye heimesider. Denne bloggen vil dermed ikkje bli oppdatert lenger sidan dei nye sidene våre dekkjer alle behov.
Besøk dei nye sidene og vinn ei tøff Ryfylke Kajakk t-skjorte!

Rockhopperkurs på Bulandet

Då var eg vel heime igjen etter årets Stormsamling på Bulandet. Måtte tenke over det på vei opp, og kom fram til at dette var niande gongen eg fekk padle i kajakkeldoradoet. I år som i fjor skulle eg halde rockhopperkurs, litt kjipt at Hallvard Torp ikkje skulle vere med, me har haldt ein del gøyale kurs saman. Men med nydelig forhold på laurdagen, med sol, 5m/s og store fine bølger gjekk det slik det måtte gå. For dei som er usikre på kva eit slikt kurs går ut på går det vel litt fram av bileta kva me held på med.. Me var så heldige at den profesjonelle fotografen Lars Grepstad var med på samlinga og durte rundt i ein åpen liten motorbåt medan han knipsa det eine blinkskuddet etter det andre. Me har fått lov å vise dykk nokre av dei fine bileta han tok frå rockhopperkurset:

Oddvin møter veggen..

Litt teknikktrening høyrer med på rockhopperkurset

Odin leiker seg i sidesurf, han blei god!

Meg og Eivind Aadland på vei ut i havet..
Takk til alle de som var med og gjorde denne samlinga heilt toppers! Og til dei av dykk som ikkje var der, skjerp dykk!

Vinn gåvekort på eitt "to dagers kurs" med Ryfylke Kajakk

Send inn ditt beste padlebilete, premien er eitt gåvekort på eit to dagars kurs med Ryfylke Kajakk.

Valet står mellom grunnkurs og teknikkurs. Du kan også velge om du vil bruke det sjølv eller gi det til nokon andre.

Juryen som kjem til å avgjere vinnarbiletet består  av kunstnar og fotograf Kristian Sirnes, mangeårig fotoentusiast Torbjørn Bjelland og friluftsmannen Vegard Nessa.

Reglane er enkle:

- Du kan kun sende inn eitt bilete.
- Du må ha tatt bilete sjølv.
- Bilete må på ein eller annan måte ha med padling å gjere.
- Frist 1.desember.
- Du bør sjølvsagt ha ein småtreffande bildetekst.
- Finalebileta vert publisert her på bloggen, om teknisk ansvarlig for bloggen lærer seg avansert blogging innan den tid kan det hende at vinnaren vert avgjort med avstemning.
- Me får fritt lov å bruke alle bileta som blir innsendt til kva me vil. (Akkurat denne regelen har me kun med fordi me har sett at alle andre seriøse fotokonkurransar har det.)

Send inn biletet ditt på mail. Hugs ein tøff tittel på biletet og navn og telefon nummer. Vinnaren vert  kontakta og publisert 8.desember.

Løkkje til :)

Snart Stormsamling

Årets stormsamling nærmar seg med stormskritt.
Det er duka for nok ei frisk helg på Bulandet.
Eg vel å friske dykk opp med nokre bilete frå forrige samling på øya der ute i havet. Eg skal halde rockhopperkurs og reknar med at me får to herlige dagar. Her er ingen grunn til å sitte heime og vente på fleire bilete. Meld deg på, finn fram hjelmen, ta på kajakken og trakt deg litt kaffe til turen.

Dette bilete er mynta på dei av dykk som ikkje fant hjelmen, på Bulandet kan du kome og ta livet med ro. Kjøp med deg niste frå Jokeren og ta turen over til Alden slik meg og Vegard gjorde i vår, før samlinga. Ein tur ein sjeldan gløymer og som ein skulle ynskje ikkje tok slutt.

Og husk - sjå deg ikkje attende..

Algrøyno

Hadde ein liten tur ut på Algrøyno vest på Sotra i dag. Sidan det heile var ein impulstur og eg var åleine, såg ikkje for meg nokre større stunt. Speilrefleksen låg i ein drybag mellom beina og eg tenkte å eksperimentere litt med å ta bileter frå kajakken. Har inntil nå fyrst og fremst tatt det opp når eg har fått fast grunn under beina. Med på turen var eit gullbrød på halv pris og den nyaste vesten frå Astral, The Green.

På veg vestover mot dei etterkvart så kjende holmane og steinkokeriet slo det meg kor fint det er å ikkje høyre noko anna enn ravnesang, bølgeskvulp og stilla. Vel på plass drista eg meg til å ta opp kameraet, strengt tatt øyna eg ikkje akkurat å fanga gullbiletet, men sidan målet med turen var å ta litt bilete måtte det nødvendigvis opp. Ein østlig svak bris pluss litt rotete dønningar frå vest gjorde sitt til at det blei ein del strøm der ute. Mens eg skulle knipsa det som kanskje kunne trigge ein litan blogglesar til å vurdere å ta turen ut var eg komt for langt ut. Eller det vil sei for langt inn. Eg var på vei i retning vest mot England, men inn i ein litt smal kanal kor det tidvis kom meir eller mindre mykje vatn gjennom. Resultatet blei eit småvått kamera og irritasjon over at eg ikkje kunne ta bilete mens eg padla bakover på grunn av dei store dønningane som kom rullande inn og som ville gjort seg som ein liten oppkvikkar på midtsida i "Vi over 60".

Til saken: Den nye vesten er virkelig eit funn. The Green er ein beskjeden liten type, han held seg i bakgrunnen og gjer det han skal. Her er ikkje glitter og glam, her er vest. Eg var litt skeptisk til å prøve han, eg er så veldig fornøyd med min gamle A300. I tillegg er det klart at forventningane rundt vesten sank litt når eg fann ut han var knall rød. Kunne han halde alt det andre han lova? Ja, det gjekk, rett vest. Gullbrødet derimot, det ligg nede i bilen ennå.

Elvepadling på Voss

Saman med ein fin gjeng var eg på Voss og padla i går. Først padla me Øvre Strandaelva, kjente det var lenge si eg har padla elv.. Med sludd i lufta og vinterdekk i bagasjerommet var det bare til å hive på seg ekstra ullsett og prøve å halde hovudet varmt i det kalde vatnet. Meg og Hallvard hadde egentlig tenkt å ta turen ut på Sotra og padle der, men med stiv kuling meldt på yr.no valgte me altså ei iskald, men vindstille elv på Voss. Etter å ha varma opp i bilane etter første stykke var me klar for Nedre Strandaelva. Eg har padla den ein gong før, den gong med minimal vannstand. Gamle ørnar meinte at det var svært lite vatn denne dagen. Eg syns det var nok. Vil rette Hallvard Torp ein stor takk for alle bileta. Du finn fleire bilete frå turen og mykje anna fint på bloggen hans og på galleriet hans på Picasaweb.


Her ser du Camilla kruse gjennom første stryk etter Kvernhusen(?). Ho var blitt flink på elva!



Her er meg på vei ned Kvernhusen(?). Usikker på om det er det dei kallar fossen, eg tenkte iallefall ikkje så mykje på det når eg satte utfor. Eg fekk litt hjelp av Ronny til starten slik at eg slapp å risikere å gå ned opp ned.

Røynda må fram, eg trur rett og slett at eg tok litt vatn over hovudet i det eg blei med dei meir erfarne elvepadlarane ned den nedre delen av Strandaelva. Det blei to symjeturar, litt knoting, men allikevel mykje moro! Ein ting er iallefall sikkert ein lærer fort på elva :)

Lundsvågen

I helga heldt me grunnkurs for AKER Solutions, ein herlig gjeng.

Me hadde ei fin helg, trass for regn, gode opplevingar i fleng.

Det går an å padle enn om det er kaldt og vinden bles friskt.

Husk berre å kle deg skikkeleg så det ikkje vert nifst!

Truddelidu! Truddelidei! Sann.